(٥)
حكاويهم ...كأنها حقيقة
ياخالة...معايا شنطة رمضان ....ربنا يوسعها عليك ويعطيك مايحرمك والله يابني معايا ٣ أيتام ..ربنا يعينك يا خالة ...ياترى ابوهم اتوفى من زمان ؟.... شوف يابني..الكدب خيبة ...هو ما ماتش ..لكن صحينا في يوم ما لقيناهوش...ساب البيت وطفش...زهق من هم العيال...وناس قالوا لي أصله لاف على واحدة تانية...وانا شغالة في العمارة دى جنب العبودي في ميدان روكسي عند ست طيبة ..اروح لها كل أسبوع انضف لها البيت ...وماشية الحمد لله وربنا ساترها...
ازيك يا منال ...صعبة شغلانة منادي العربيات دي ... حعمل ايه يا بيه ..جوزي شغال في جراج ..يوم يرجع لي بخمسين جنيه ...ويوم مفيش ...طب خدي شنطة رمضان ...روح ربنا يستر لك طريقك ...امال فين الست العجوزة اللى كانت قاعدة على كرسي هنا جنب البنزينة...اسكت على اللي حصل لها ...بتعدي شارع الحجاز علشان تركب تروح بيتها في النهضة ...خبطتها عربية.. اصل الشارع بقى واسع جدا والتعدية بقت خطرة ...لو عاوز تبعت لها شنطة رمضان ..انا ممكن اوصلها لها ..هي ساكنة جنبي... وخد تليفونها وكلمها.
خد تعالى....معايا شنطة رمضان ... ربنا يرزقك يا حاج ...ده محمد ابن اختي ضرير ...بيروح مع أمه جمعية المكفوفين اللي في عين شمس ...سلم يا محمد على الحاج ...ازيك يا محمد ...الحمد لله ...محمد شاطر في أولى ابتدائي... واخته بتشوف بسيط من ثقب في العين لكن مش بتسمع وبتروح مع امها جمعية الصم اللي في المحكمة... عارفها ..ايوه عارفها ...طب ابوهم شغال فين ؟ شغال على تريسكل طول النهار ...
انتي فين يا ام حسن ..معايا شنطة رمضان بتاعتك ...انا هنا قدام جامع الخلفاء ...خدي شنطتك... ممكن كلمة يا بيه ...اصل ابني عنده ٩ شهور ومحتاجة له علبة لبن كل أسبوع...والله العظيم مش بكدب عليك ...العلبة بيبي لاك كانت بسبعين جنيه امبارح غليت بقت بخمسة وتسعين ...حاضر ..حاضر ..امال ابوه شغال فين ؟ .. كان صنايعي محارة بس الحال واقف زي ماانت عارف ..
ليست هناك تعليقات:
إرسال تعليق